У судзе Добрушскага раёна 11 верасня разглядалі адміністрацыйную справу супраць прафсаюзнага чыноўніка Мікалая Талейкі. У віну яму паставілі распаўсюд інфармацыйнай прадукцыі, унесенай у рэспубліканскі спіс экстрэмісцкіх матэрыялаў, а таксама выраб, выданне, захоўванне альбо перавозку з мэтай распаўсюду такой прадукцыі, паведамляе Гомельская Вясна.
Паводле часткі 2 артыкула 19.11 КабАП пастанову выносіў суддзя Алег Васюкоў. Якое канкрэтна адміністрацыйнае спагнанне наклалі на прафсаюзнага функцыянера высвятляюць праваабаронцы.
Мікалай Талейка. Скрыншот відэа СТБ
Мікалай Талейка - галоўны прававы інспектар працы Гомельскай абласной арганізацыі Беларускага прафесійнага саюза работнікаў гандлю, спажывецкай кааперацыі і прадпрымальніцтва, які ўваходзіць у практычна дзяржаўную ФПБ.
Флагшток патэлефанаваў у Гомельскую абласную арганізацыю Беларускага прафесійнага саюза работнікаў гандлю. Аднак ні ў адным кабінеце слухаўку ніхто не зняў.
Гэта ўжо другі кіраўнік праўладнага прафсаюза, якога прыцягваюць за распаўсюд экстрэмісцкіх матэрыялаў. У снежні 2023 г паводле ч. 2 арт 19.11 КабАП судзілі Таццяну Хацкову — старшыню Гомельскай абласной арганізацыі Беларускага прафсаюза банкаўскіх і фінансавых работнікаў. Яе тады зняволілі на 15 содняў і потым звольнілі з пасады.
Таксама Флагштоку было вядома пра палітычныя рэпрэсіі ў дачыненні да старшыні праўладнага прафсаюза Белпрафмаш Аляксандра Балошкі, які быў пакараны 10 соднямі.
