Вядомы гомельскі грамадскі актывіст Валерый Сляпухін спрабаваў абскардзіць адміністрацыйны арышт, які меў месца ў сярэдзіне кастрычніка. Тады Інтэрнэт абляцелі фотаздымкі ягонага брутальнага затрымання. Некалькі байцоў АМАП–у беспадстаўна ўжылі ў дачыненні да гомельца фізічную сілу. У выніку гэтага затрымання Валерыю Сляпухіну былі нанесеныя некалькі траўмаў, але яго ўсё роўна асудзілі на 15 сутак арышту за непадпарадкаванне патрабаванням міліцыянтам.
Фота: тг–канал Гомельский чат конструктивных изменений
Суддзя Гомельскага абласнога суда Васіль Бягун, выслухаўшы аргументы грамадзяніна, пакінуў рашэнне суда Цэнтральнага раёна без змяненняў. “Што ж, будзе нагода напісаць скаргу на суддзю і абскардзіць рашэнне ў Вярхоўным судзе”, — каментуе Валерый Сляпухін.
Фота: акаўнт Валерыя Сляпухіна ў фэйсбуку
Для Валерыя Сляпухіна рашэння абласнога суда было чаканым. На справядлівае рашэнне ў цяперашніх умовах ён не разлічваў. Аднак актывіст лічыць, што трэба абавязкова ўсё роўна звяртацца ў суд: “Калі не аспрэчваць падобныя справы ў судах, то агрэсія з боку сілавікоў будзе яшчэ большая”.
Пасля затрымання ў Валерыя Сляпухіна назіраюцца праблемы са здароўем. У прыватнасці, як засведчылі медыкі, пагоршыўся зрок на два пункты на правым воку, дзе быў сіняк. Таксама дадатковага даследавання патрабуюць каленны і галёнкаступнёвы суставы.
Валерый Сляпухін — стваральнік грамадзянскай ініцыятывы “Жыві як гаспадар”. Мэтай яе з’яўляецца вырашэнне арганізацыйных, юрыдычных, камунальных і эканамічных пытанняў, звязаных з гарадскімі дамамі і вуліцамі. Гомельцы таксама ведаюць Валерыя як абаронцу зялёнай зоны вакол возера Бабрыха, якой пагражае забудова жылымі раёнамі.
Флагшток