Веткаўскі музей стараабрадніцтва і беларускіх традыцый імя Ф.Р. Шклярава вымушана адмяніў традыцыйнае Гуканне вясны, якое планавалі правесці 22 сакавіка ў Ветцы. Літаральна назаўтра пасля анонсу музей паведаміў:
«На жаль, адмена мерапрыемства, у сувязі з рэкамендацыяй не праводзіць масавыя мерапрыемствы ў памяць сумнай гадавіны Хатынскай трагедыі».
Фота: Веткаўскі музей стараабрадніцтва і беларускіх традыцый імя Ф.Р. Шклярава
Відавочна, такую «рэкамендацыю» далі музею ідэолагі мясцовых органаў улады. У каментарах пацікавіліся, ці будзе перанос мерапрыемства. У музеі адказалі:
«На жаль, не, на астатнія суботы і нядзелю сакавіка, а таксама на першыя выходныя красавіка ў нас ужо запісы на майстар-класы і экскурсіі, і супрацоўнікі, што ўдзельнічаюць у Гуканні, будуць занятыя гэтай працай. А гукаюць да 7 красавіка ў нашым рэгіёне».
Хатынская трагедыя сапраўды адбылася 22 сакавіка. У гэты дзень у 1943 годзе байцы карнага атрада нацыстаў спалілі вёску разам з жыхарамі.
«Памятаць трагедыю трэба, але і нельга забараняць жывым жыць і жыццю радавацца», – выказаў меркаванне ў каментарах адзін з падпісчыкаў веткаўскага музея.