Да 40-й гадавіны катастрофы на Чарнобыльскай АЭС распавядаем пра старадаўнія закінутыя сядзібы, якія засталіся ў зоне адсялення на Гомельшчыне. Актуальны стан дзвюх такіх сядзібаў у зоне Веткаўскага раёну паказала газета «Голас Веткаўшчыны».
Адна з іх дастатковая вядомая і зарэгістраваная ў Дзяржаўным спісе гісторыка-культурных каштоўнасцяў Беларусі. Гэта помнік архітэктуры пачатку XIX стагоддзя – былы сядзібны дом у адселенай вёсцы Рэчкі. Хто быў яго ўладальнікам, дакладных звестак няма.
Фота: «Голас Веткаўшчыны»
У крыніцах толькі сустракаюцца ўзгадкі ўладальнікаў вёскі Васільевых, Пячкоўскіх і Бычкоўскіх. Некаторыя называюць будынак сядзібай Шульцаў. Пасля рэвалюцыі бальшавікоў сядзібу нацыяналізавалі і пазней размясцілі ў ёй вінзавод.
Фота: «Голас Веткаўшчыны»
У былой вёсцы Пацёсы засталіся руіны з чырвонай цэглы. Яны нагадваюць будынак сядзібы, а ў савецкі час, як кажуць мясцовыя, тут быў калгасны клуб.
Пра тое, што ў Пацёсах калісьці была панская сядзіба, аўтару веткаўскай раёнкі распавядала 90-гадовая Вольга Кажамякіна з Рудні-Стаўбунскай. Яе родная бабуля Паліна Кавальская некалькі дзесяцігоддзяў служыла ў гэтым маёнтку. Паводле яе, пан актыўна займаўся жывёлагадоўляй. У 1916 годзе з'ехаў у эміграцыю, прадчуваючы бальшавіцкую навалу.
Фота: «Голас Веткаўшчыны»
Таксама ў ліквідаванай вёсцы Быкавец знаходзіліся фальварак і драўляная сядзіба. Аднак іх слядоў аўтар матэрыялу не знайшла.
Пра сядзібы ў адселеных вёсках іншых раёнаў Гомельшчыны раней распавядаў Флагшток. Глядзіце відэа і чытайце па спасылках:
