Гомельская блогерка Вікторыя Гусарава паведаміла ў сваім Інстаграме, што знаходзіцца дома, дзе за ёй сумавалі. Пра гэта паведамляе Гомельская Вясна.
Вікторыя Гусарава. Старонка ў Instagram
17 студзеня ў Гомельскім абласным судзе распачаліся пасяджэнні у крымінальнай справе, дзе Вікторыю абвінавачвалі паводле часткі 1 артыкула 130 ў распальванні расавай, нацыянальнай, рэлігійнай альбо іншай сацыяльнай варажнечы. Што канкрэтна ставілася ў віну блогерцы пакуль невядома. Выконвала палітычную рэпрэсію прызначаная асабіста Лукашэнкам на пасаду суддзі Алеся Осіпава.
Учора Вікторыя Гусарава выклала пасты пра тое, што знаходзіцца дома. Відавочна, вынесены ёй прысуд не звязаны з пазбаўленнем волі і яе вызвалілі ў зале суда. Якім канкрэтна чынам Осіпава пакарала Вікторыю зараз высвятляюць праваабаронцы.